قبل ما ندخلوا في صلب الموضوع يلزمك تعرف الّي رانا المفروض ما نجاوبوش الصغار، لكن برّا هاو بش نعطييوك نصف رطل قيمة و بش نزيدوك وقيّة قدر فمّاشي ما نذكّروك في كلمة قالها الأستاذ فتحي المولدي « إلّي بش يجبد الترجي بكلمة يلزموا يقوم بكري »
ثانيا، كيف وصل حال جمعيتك إلى ما هو عليه يلزمك تفهم علاش و كيفاش. و إذا كانك موش عارف أحنا هوني، أمّالي البلاد، نذكّروك الّي انت عندك يدّ في الحكاية، كيفك كيف سليم الرياحي، كيف اليونسي، سمسرتوا بجمعيّتكم، بعتوا و شريتوا و كذبتوا و دلّستوا وثائق
أسرع تطريدة صارت معاك انت في أوت 2018، شهر بعد لا بديتوا تخدموا. رجعت تخدم مع اليونسي و هاك تشوف وين وصّلتوا جمعيتكم، ديون، خطايا، حذف نقاط، تهديد بالإنزال إلى القسم الثاني، ملاعبية موش خالصة و الله أعلم الجاي كيفاش
و جاي تحكي في الراديو، عند هاك المريض اسلام مدّب، على أساس بش تبرّر موقفك تجبد في الترجي الرياضي التونسي و تقول لوكان جات الأزمة هاذي عند الترجي راهي تحلّت
علاش ؟ ياخي إنتوما ما زلتوا ما تحلّيتوش؟ هيئتكم تحلّت و تفرّكت طرف طرف و انت مازلت تصبّر في روحك. ياخي نسيت كي جاء محامي الهانة متاعكم بن خليل كيف قال الإفريقي ما فيهاش رجال ؟ نسيت كي جاء الممثّل و قال زادة الإفريقي ما فيهاش رجال ؟ نسيت كي قال عليكم الرياحي حمقى؟
كيفاش غاطسين في الهمّ للعنكوش و تحلّ فمّك على أسيادك؟ أبطال إفريقيا في نسختين على التوالي، أبطال تونس، أبطال في الطائرة و اليد و الجيدو و الملاكمة و المصارعة و السباحة، صغار و كبار، جمعية تسيّر فيها رجال ما تحسبش، إدارة ساهرة على الصغيرة قبل الكبيرة و جاي تحكي علينا ؟ ما تحشمش؟ يا صغيّر، ما تحشمش؟
ننصحك إمشي إسأل وليد الهيشري و إسأل خالد المولهي على الترجي الرياضي التونسي ، إسأل مجدي التراوي تو يحكيلك على الترجي الرياضي التونسي و لوكان ماكش مقتنع إسأل المدير الفني كمال القلصي تو يحكيلك على الترجي الرياضي التونسي
فيق يا صغيّر، يا متع الهربة، و مانيش نحكي على طرح الهربة متع ملاعبيّتكم، لا، نحكي على هربة جمهوركم في طرح 3-1. فيق يا صغيّر، تحكي على جمعيّة يسيّروا فيها ناس ما ترقدش الليل بش الورقة توصل في وقتها، و الطيارة تطلع في وقتها، و الملاعبية ترقد في وقتها و تترانا في وقتها و تتعشّى في وقتها و الشهاري متع الملاعبية تتصبّ في وقتها. ماشي في بالك زريبة كيف الّي عندكم ؟ هذيكة حديقة متع المرحوم منير القبايلي؟ هذاكة مقرّ متع جمعية تحترم روحها و تحترم جمهورها ؟ فيق يا صغيّر، راك صغيّر ياسر على الترجي الرياضي التونسي
سلام يا….الصغيّر، و سلّملي على صاحبك المريض بالترجي و ماعادش تجبدنا على لسانك !
هيئة تحرير الموقع