الكتيبة ميديا استقصائي اختارت انو تعمل تحقيق على موضوع علاقة دليس بالاعلام. بالطبيعة مفما شي ملموس في نتائج التحقيق، غير انو برهنت انها ميديا مجانبة للحياد. مولاها محب للافريقي والصحفي الي خدم التحقيق محب للافريقي… محايدين بالطبيعة… ورغم مشاكل الميديا العديدة… الاولوية كانت اعلام دليس و الحَوكمة في الترجي.
1- دليس يمول في برشا تلافز وراديوات منذ عشرات السنين، وماهوش المستشهر الوحيد الي مرتبط يجمعيات كورة ويعمل في اعلانات. على سبيل الذكر، منتوج مشروبات يعمل في الاشهار في التلافز لكل منذ عقود وكان مستشهر لأغلب الجمعيات الرياضية وحد متكلم على تضارب المصالح مع العلم انو صاحب المجمع رئيس سابق لجمعية يزعموا أنها كبيرة وكان الممول التاريخي متاعها. منحكيوش على تلافز بطم طميمها تحت نفوذ عائلات تحكم في جمعيات كبيرة ولليوم كي تتفرج في برامجها تفهم توجّهها.
2- دليس مستشهر تونسي، يِخدّم في الاف التوانسة، يدفع في الضرايب، وارقامو ومحاساباتو منشورة. المستشهرين الي منعرفوش مواردهم منين وما عندنا حتى فكرة على مصادرهم وما فمّا حتى شفافية عليهم، هاذوكم ميهمناش فيهم، وميهموش صحافة الاستقصاء!
3- كي تعمل بحث عن الحَوكمة في الترجي ما تنجّم تكون كان حاجة مضحكة. الترجي الفريق الوحيد الي ميزانيتو متوازنة. اما الجمعيات الي ديونها متلتلة وماخذا مليارات من فلوس الضرايب بدون وجه حق، وقتلي جمعيات صغيرة اخرى طيحوها ومعطوهاش نفس الامتياز… هذا فساد منتصورش الكتيبة تجبد عليه. زعمة موضوع دليس أهم وأخطر؟
4- وقتلي كرونيكورات تهاجم يوميا فريق على حساب فريق، وتركّز على لاعب معيّن كيما صاحبنا الي محبش يحجم شلاغمو، ولا الكرونيكور إمام جامع، الي من أول العام لتوة وهوما يسبو في الترجي ويسبو في البلايلي… التصرفات هذي الي تخلق في فتنة في البلاد والي تبتعد كل البعد عن الحرفية والنزاهة تعجب الكتيبة ومتقلقهاش، وتعجب معز بن غربية… وميحكيوش عليهم، وميهمهمش.
5- على ذكر مشاكل الميديا، الي حصرتهم الكتيبة في اعلام دليس. صحفي بلون معيّن، يدافع على احتراز النجم ضد قوافل ڨفصة منذ أشهر في بلاتو، ملي تعمل الاحتراز الاول على خطايا الانذارات. دفاع شرس في كل حصة من وقتها لتوة وتأثير واضح على الرأي العام، على الرابطة وعلى لجنة الاستئناف… اي والفريق المنافس شكون يمثلو؟ شكون يعطي وجهة نظرو؟ نفس الصحفي ساعة ساعة يعطينا دروس على الجهويّات والفتنة! مكانش هذا بالقدر الكافي، حضور الصحفي في البرنامج لخّر كان مصاحب ليه حضور محامي النجم، الي عمل مرافعة لفائدة النجم، وزاد عطا رايو على لقطة البلايلي. هذا الكتيبة أمر ميهمهاش ومعندوش علاقة بالمشاكل الحقيقية للاعلام والصحافة.
قطاع كلو مشاكل متاع حرفية وحيادية… وفما حتى مشاكل أعمق وأخطر ببرشة منحبوش نحكيو عليهم توة… وكل هذي المشاكل تتلخص في أي موقف نختلقوه بش نضربو بيه الترجي.
