« أرض حرة في عالم محتل .. هذه هي قيمنا النبيلة »
التيفو بيعرض مشهد الشيخ خالد نبهان مع حفيدته ريم « روح الروح » وقصادهم جدار عازل وهو الجدار العازل بينا وبينهم في رفح والجدار مش مقصود بيه مصر تحديدا لكن مقصود بيه العالم كله اللي شايفهم شهور بيتم ابادتهم ومفيش أي حد بيتحرك تحرك فعلي..
صــنــع فــي عْــرْة
وهنا بيتم تسليط الضوء على 3مواقف حصلوا في غزة وكل موقف منهم بيعبر عن صفة من الصفات العظيمة لأهلنا في فلسطين
النموذج الأول: دكتور أميرة العسولي وموقفها العظيم لما عدت الشارع رغم صْرب النار والقصف عشان تنقذ شخص تعرض لاطلاق نار وتحت الصورة مكتوب « شجاعة واضحة »
النموذج التاني .. مشهد الشيخ خالد نبهان مع حفيدته ريم « روح الروح » وهو شايلها بعد ما استشهدت وبيتكلم بكل ثبات وايمان بالله قبل ما يسلمها عشان تدفن ومكتوب تحت الصورة « ايمان ثابت – ايمان لا يزعزع ». *لو مشفتش الفيديو أعمل سيرش على اليوتيوب باسم روح الروح هيظهر لك الفيديو
النموذج التالت .. مشهد مساعدة واحد من رجالة القسام لاحدى الاسيرات قبل تسليمها في صفقة التبادل اللي تمت ومعاملتها بتعاليم الاسلام ومكتوب تحت الصورة « انسانية غير معلنة » وغير معلنة هنا لان الاعلام الغربي بيشيطنهم وبيصورهم على انهم زيهم زي الدواعش
« كن على الجانب الصحيح من التاريخ »
هنا بيتم استخدام جملة سياسية شهيرة وهي « كن على الجانب الصحيح من التاريخ ». وبيتم تسليط الضوء على 8 شخصيات أو نماذج من اللي واقفين مع الحق وبيدعموا فلسطين خلال الاحداث الحالية بشكل قوي. وخلفهم اعلام الدول اللتي وقفت مع الحق وناصرت القضيه.
الشخصية الأولى .. عديلة هاشم محامية من جنوب افريقيا من اصول يمنية .. وواحدة من فريق دفاع جنوب افريقيا قصاد محكمة العدل الدولية في القضية اللي رفعتها جنوب افريقيا على الصهاينه وهنا استخدام شخصية بعينها لتكريمها لعظمة المرافعة اللي قدمتها قصاد المحكمة واستخدامها كرمز لكل محامي منهم
الشخصية التانية .. شاب صغير بلبس وعمامة مشهور بيهم أهل اليمن .. في اشارة لموقف اليمن العظيم من بداية الاحداث وحتى وقتنا الحالي
الشخصية التالتة .. الصحفي الفلسطيني صالح جعفراوي ووجوده هنا كرمز لأي صفحي أو مصور كان او ما زال موجود في فلسطين من بداية الاحداث وبيخاطر بحياته في كل لحظة عشان يوصل الصورة للعالم
الشخصية الرابعة .. أنطونيو غوتيريش أمين عام الامم المتحدة وليه موقف واضح وصريح في دعم القضية ووجوده هنا كرمز لأي شخص سياسي أيا كان مكانه او منصبه واقف وبساند الحق اللي مع اخواتنا
الشخصية الخامسة .. الطبيب الفلسطيني غسان أبو ستة الملقب بطبيب الحروب وهو رمز لكل دكتور و طبيب أو طبيبة موجودين في فلسطين ورفضوا يتركوا مكانهم وادوا رسالتهم ومهمتهم رغم كل المخاطر والتهديدات وثبتوا عشان يحاولوا يعالجوا الناس رغم ان الظروف شبه مستحيلة
الشخصية السادسة .. مشجع من جماهير نادي سيليتك الاسكتلندي .. في تحية وشكر لجمهور سيلتك العظيم واللي من أقوى وأكبر المناصرين والمؤيدين لفلسطين من المدرجات رغم كونه نادي غربي اوروبي وفيه رسالة لكل جمهور ايا كانت بلده واقف ورا القضية.
الشخصية السابعة .. طالبة شايلة يافطة مكتوب عليها « اوقفوا الإبادة الجماعية » في اشارة لطلاب الجامعات الامريكية اللي نظموا اعتصامات داخل الجامعات لدعم فلسطين والمطالبة بوقف الإبادة واللي كان ليهم تاثير وصدى قوى في الغرب وتم اعتقال وفصل كتير منهم
الشخصية التامنة .. رئيس كولومبيا غوستافو بيترو واللي موقفه هو ودولته واضح وصريح من أول يوم في دعم القضية وقطع علاقات بلاده مع اللي ما يستموا ووجوده هنا للاشادة بموقفه وكرمز لأي رئيس دولة في العالم عمل نفس الموقف رئيس كولومبيا تفاعل مع التيفو من شويه وكان فرحان جداً
وهتلاقي في خلفية التيفو ورا مجموعة اعلام دول، الدول دي كلها المفروض ان ليها مواقف مختلفة واضحة وقوية في دعم القضية « جاميكا – نيكاراغوا – الكاميرون – الجزائر – كوبا – البرتغال – تشيلي – ليبيا – تونس – اسبانيا – جنوب افريقيا » وعلم فلسطين مكرر فوق ومره بعلم كبير مع مشجع سيلتيك تحت.
